La Repubblica: Meloni mund të japë dorëheqjen në mars

Kryeministrja italiane Giorgia Meloni po shqyrton mundësinë e mbajtjes së zgjedhjeve të parakohshme parlamentare në Itali dhe mund të japë dorëheqjen në mars të vitit 2027, pas një samiti të Këshillit Evropian që do të mbahet në Romë, duke hapur rrugën për procesin e ri elektoral. Megjithëse pozicioni zyrtar i qeverisë mbetet se votimet do të mbahen në përfundim të mandatit, zhvillimet e brendshme politike dhe protestat e dhunshme në disa qytete italiane kanë sjellë në vëmendje skenare të reja për kalendarin e ardhshëm politik të vendit.

Sipas një raportimi të botuar nga gazeta La Repubblica, ky skenar është diskutuar gjatë takimeve që kryeministrja ka zhvilluar me drejtuesit e koalicionit qeverisës në Pallatin Kixhi. Gjatë këtyre bisedimeve, ajo ka paraqitur para aleatëve të saj, Antonio Tajani, Matteo Salvini dhe Maurizio Lupi, idenë që pas mbledhjes së Këshillit Evropian në kryeqytetin italian të paraqitet te presidenti i Republikës për të kërkuar shpërndarjen e Parlamentit.

Samiti i jashtëzakonshëm në Romë është parashikuar të organizohet në kuadër të 70-vjetorit të nënshkrimit të Traktatit të Romës, i cili u nënshkrua më 25 mars 1957 dhe hodhi themelet e Komunitetit Ekonomik Evropian, pararendësit të Bashkimit Evropian. Sipas burimeve qeveritare, Meloni e ka diskutuar drejtpërdrejt organizimin e këtij takimi të posaçëm me presidentin e Këshillit Evropian, António Costa, i cili konfirmoi se samiti do të zhvillohet atje. Po ashtu, burime evropiane bënë të ditur se për këtë plan është informuar edhe kryeministri belg Bart De Wever, i cili dha pëlqimin që takimi të mos mbahet në Bruksel, por në Romë. Prania e liderëve evropianë pritet të shërbejë si akti i fundit i kryeministres përpara se t'i drejtohet kreut të shtetit.

Në lidhje me datat e mundshme të zgjedhjeve, burimet nga qarqe të Partisë së Vëllezërve të Italisë dhe Forza Italia-s citojnë 16 majin 2027 si një nga opsionet e para, ndërsa një alternativë tjetër mbetet fillimi i qershorit. Legjislacioni parashikon që zgjedhjet të zhvillohen jo më herët se 45 ditë dhe jo më vonë se 70 ditë nga shpërndarja e Dhomave. Një tjetër skenar që po shqyrtohet është zhvillimi i zgjedhjeve parlamentare në të njëjtën ditë me zgjedhjet lokale në qytetet kryesore, si Roma, Milano, Napoli, Torino dhe Bolonja. Kampi i djathtë ka përshpejtuar tashmë punën për përzgjedhjen e kandidatëve për këto qytete, ndërsa zyrtarët e lartë si Giovanbattista Fazzolari dhe Francesco Filini kanë përmendur më parë muajin qershor si periudhë të mundshme votimi.

Pavarësisht diskutimeve dhe skenareve të qarkulluara për krizën aktuale dhe hapat e mundshëm të qeverisë, drejtuesit e koalicionit vijojnë të deklarojnë publikisht se mandati do të plotësohet plotësisht, ndërsa nuk ka ende një njoftim zyrtar për dorëheqje apo për caktim të parakohshëm të zgjedhjeve.