Të mërkurën shi e shtrëngata në veri, era deri në 16 m/s në bregdet
Shërbimi Meteorologjik Ushtarak parashikon erëra deri në 16 m/s në bregdetin veriperëndimor dhe temperatura deri në 36 gradë.
Redaksia ZHURMA · · Përditësuar · 1 min lexim
TIRANË — Shërbimi Meteorologjik Ushtarak parashikon se të mërkurën vendi do të ndikohet nga kushte atmosferike relativisht të paqëndrueshme. Moti pritet me kthjellime kryesisht në jug dhe vranësira mesatare deri lokalisht të dendura në pjesën tjetër të vendit. Në orët e para të mëngjesit, veriu dhe qendra do të kenë reshje shiu me intensitet të ulët, të shoqëruara me shtrëngata afatshkurta dhe shkarkesa elektrike.
Prej mesditës deri pasdite vonë priten reshje të tjera me intensitet kryesisht të ulët, ndërsa përgjatë zonave malore nuk do të mungojnë shtrëngata afatshkurta pasditeje. Era do të fryjë verilindje – veriperëndim me shpejtësi mesatare 8 m/s në brendësi, ndërsa në bregdetin veriperëndimor pritet të fitojë shpejtësi deri në 16 m/s.
Valëzimi në det parashikohet të jetë i forcës 1-2 ballë. Temperaturat do të luhaten nga 16 gradë në Shkodër deri në 35-36 gradë në Berat e Gjirokastër, ndërsa në bregdet Durrësi e Vlora priten me 32 dhe 34 gradë respektivisht.
Burim: ATSH
— Redaksia ZHURMA
