Shqipëria harton projektvendimin e ri për bateritë dhe mbetjet

Ministria përgjegjëse për Mjedisin ka përgatitur projektvendimin “Për bateritë dhe mbetjet e baterive”, i cili synon përafrimin e plotë të legjislacionit vendas me Rregulloren e Bashkimit Evropian 2023/1542. Sipas relacionit shpjegues, nisma synon mbrojtjen e mjedisit dhe shëndetit përmes parandalimit të ndikimeve negative nga lëndët e rrezikshme.

Kuadri i ri rregullator përfshin pesë kategori kryesore: bateritë portative, ato për nisjen e automjeteve, bateritë industriale, mjetet e lehta të transportit dhe automjetet elektrike. Ndër risitë teknologjike përfshihen sistemi i gjurmueshmërisë me kode QR, pasaporta dixhitale, deklarimi i gjurmës së karbonit dhe përmbajtja minimale e materialeve të ricikluara.

Projektakti mbështetet në parimin e Përgjegjësisë së Zgjeruar të Prodhuesit, ku prodhuesit dhe importuesit do të mbulojnë të gjitha kostot financiare për rrjetin e grumbullimit dhe riciklimit, pa ngarkuar buxhetin e shtetit. Projeksionet parashikojnë se sasia e baterive në treg do të arrijë në rreth 7,423 ton për vitin 2026 dhe mbi 10,290 ton deri në vitin 2035. Për këtë qëllim, planifikohet ngritja e rreth 5,000 pikave kombëtare të grumbullimit për bateritë portative, me një investim fillestar deri në 350,000 euro.