Pse Dua Lipa hapi bibliotekën e saj në Portugali?
Çfarë synon këngëtarja me famë botërore me hapësirën kushtuar librave të ndaluar dhe të censuruar?
PORTO — Këngëtarja me famë botërore, Dua Lipa , ka inauguruar Bibliotekën Manifesto, një hapësirë kushtuar librave të ndaluar dhe të censuruar, e cila do të jetë pjesë e përhershme e librarisë historike Livraria Lello në Porto të Portugalisë. Projekti u prezantua në kuadër të festivalit ndërkombëtar të librit BABELL – City of Books dhe, sipas artistes, është rezultat i një misioni shumëvjeçar për të promovuar leximin dhe lirinë e shprehjes.
Biblioteka përmban rreth 100 libra, të organizuar sipas katër temave kryesore: pushteti, kontrolli, zëri dhe kujtesa. Në raftet e saj gjenden vepra të njohura si “The Handmaid’s Tale” e Margaret Atwood, “Felon” i Reginald Dwayne Betts, si dhe libra të autorëve Salman Rushdie dhe Olga Tokarczuk.
Sipas këngëtares, Biblioteka Manifesto është një vend që u kushtohet autorëve, veprat e të cilëve janë censuruar ose ndaluar, si dhe lexuesve që besojnë se askush nuk duhet të vendosë se cilët libra lejohen të lexohen.
Burim: Shqiptarja, https://shqiptarja.com/lajm/liri-per-librat-e-ndaluar-dhe-te-censuruar-dua-lipa-hap-biblioteken-e-saj-ne-portugali
— Redaksia ZHURMA
