Çfarë rrëfen dokumentari zviceran për rrugën e deputetit Islam Alijaj?
Filmi "Voice of My People" shpalos fushatën e deputetit të parë shqiptar në parlamentin zviceran, të parin me paralizë cerebrale.
ZËRICH — Në vitin 2023, Islam Alijaj u zgjodh deputet në parlamentin e Zvicrës nga radhët e Partisë Socialdemokrate (SP), duke u bërë politikani i parë me paralizë cerebrale dhe pjesëtari i parë nga komuniteti shqiptar. Tani dokumentari "Voice of My People" (Zëri i popullit tim) hedh dritë mbi fushatën e tij.
Filmi pati premierën në kinemanë "Riffraff" të Zürichut, sipas gazetës "Blick". Dokumentari nis me zhgënjimin e Alijajt kur bashkëpartiakët e renditën në vendin e 11-të në listën zgjedhore — për një kandidat me prejardhje të huaj dhe aftësi të kufizuara, shanset dukejshin zero.
Me ndihmën e strategut të marketingut David Wember, Alijaj investoi rreth 300 mijë franga në fushatë, i mbështetur nga organizata "Pro Infirmis" dhe biznesi familjar "Wischmobb". Për shkak të mungesës së oksigjenit gjatë lindjes, ai lëviz me karrige invalidore dhe ka vështirësi në të folur.
"Kur isha adoleshent, e urreja aftësinë time të kufizuar", rrëfen ai. Motivimin kryesor e gjen te familja: "Nuk dëshiroj që dy fëmijët e mi të rriten në një shoqëri ku babai i tyre shihet si më pak i vlefshëm." Në parlament, Alijaj angazhohet për 1.8 milionë njerëz me aftësi të kufizuara në Zvicër.
Burim: Telegrafi
— Redaksia ZHURMA