Reflektimi i Ueli Leuenberger pas ngjarjeve të 16 shtatorit në Hagë
Një letër opinionit shqiptar nga ish-deputeti zviceran Ueli Leuenberger trajton aktgjykimin në Hagë dhe kauzën e lirisë.
Ngjarjet e 16 shtatorit kanë nxitur reagime dhe reflektime të ndryshme në opinionin publik. Ueli Leuenberger, iniciator dhe ish-drejtor i Universitetit Popullor Shqiptar në Gjenevë, si dhe ish-deputet në parlamentin e Zvicrës, ka ndarë një letër drejtuar opinionit shqiptar. Prej gati një gjysmë shekulli, ai njihet si mbështetësi i përpjekjeve për liri të shqiptarëve të Kosovës dhe mbrojtës i komunitetit shqiptar në Zvicër ndaj tendencave të diskriminimit. Në këtë shkrim, ai reflekton mbi aktgjykimin e fundit në Hagë dhe kauzën e drejtë të shqiptarëve të Kosovës.
Leuenberger tregon se disa miq i kishin dhënë një bluzë të zezë me mbishkrimin «Jo në emrin TIM!» dhe me emblemën e UÇK-së, duke e ftuar të merrte pjesë në manifestimin në Sheshin e Kombeve, para selisë së OKB-së në Gjenevë. Megjithëse ishte i angazhuar me një projekt radiofonik dhe nuk mundi të lirohehej, ai pranon se edhe po të kishte qenë i lirë do të kishte hezituar të shkonte, pasi me disa parulla, simbole dhe pjesë të atmosferës do të ishte ndier në siklet, pavarësisht pranisë së shumë miqve dhe mikeshave të tij shqiptare.
Duke theksuar se flet pa dashur t'u japë mësime kosovarëve, ai shton se kurrë nuk ka dyshuar në legjitimitetin e luftës së shqiptarëve të Kosovës kundër shtypjes së regjimit të Millosheviqit, as në rolin thelbësor që UÇK-ja ka luajtur në çlirimin e Kosovës. Kjo bindje e palëkundur e bën atë të ndjejë thellësisht atë që po ndodh aktualisht, ndërsa shton se e kupton thirrjen dhe një pjesë të madhe të zemërimit ndaj Dhomave të Specializuara.