Çfarë ndryshon me shpalljen e Dhërmiut si pasuri kulturore?

TIRANË — Këshilli i Ministrave ka miratuar vendimin për shpalljen e qendrës historike të fshatit Dhërmi si pasuri kulturore e paluajtshme. Ministri i Turizmit, Kulturës dhe Sportit, Blendi Gonxhja, deklaroi se ky akt forcon mbrojtjen e vlerave historike dhe kulturore të zonës përmes një kuadri të përditësuar për administrimin e saj.

Gonxhja shpjegoi se statusi i Qendrës Historike, i cili ekziston që prej vitit 2016, vijon të ruajë identitetin unik të fshatit. Ai theksoi se akti i miratuar nuk ndryshon kufijtë e zonës mbrojtëse, por përditëson rregullat dhe procedurat për konservimin, duke siguruar që qendra historike e fshatit Dhërmi të zhvillohet në harmoni me peizazhin dhe arkitekturën tradicionale.

Vendimi përcakton zonën mbrojtëse në bazë të hartave të zonifikimit dhe koordinatave në Kornizën Referuese Gjeodezike Shqiptare (KRGJSH). Këshilli i Ministrave miratoi gjithashtu planin për ruajtjen dhe administrimin e zonës përreth, me qëllim garantimin e një zhvillimi të qëndrueshëm që mbron trashëgiminë kulturore të një nga destinacionet më të veçanta të vendit.

Për implementimin e këtij vendimi, janë ngarkuar Autoriteti Shtetëror për Informacionin Gjeohapësinor për publikimin e hartave në Gjeoportalin Kombëtar dhe Agjencia Shtetërore e Kadastrës për regjistrimin zyrtar të aktit. Ky proces synon të formalizojë mbrojtjen ligjore të zonës për të parandaluar ndërhyrje që mund të dëmtojnë vlerat historike të Dhërmiut.

Burim: ATSH
— Redaksia ZHURMA