Qendra historike e fshatit Dhërmi shpallet pasuri kulturore
Si do të administrohet mbrojtja e trashëgimisë kulturore në këtë zonë të Himarës?
TIRANË — Këshilli i Ministrave miratoi sot vendimin për deklarimin pasuri kulturore e paluajtshme të qendrës historike të fshatit Dhërmi. Sipas aktit zyrtar, zona e saj mbrojtëse është përcaktuar në bazë të hartave të zonifikimit dhe koordinatave të Kornizës Referuese Gjeodezike Shqiptare (KRGJSH).
Vendimi përfshin miratimin e një plani të detajuar për ruajtjen, mbrojtjen dhe administrimin e qendrës historike dhe zonës përreth. Qëllimi i këtij hapi është garantimi i mbrojtjes së trashëgimisë kulturore, duke synuar një zhvillim të qëndrueshëm të kësaj zone turistike.
Zbatimi i vendimit u ngarkohet ministrisë së Turizmit, Kulturës dhe Sportit, ministrisë së Infrastrukturës dhe Energjisë, si dhe bashkisë Himarë. Gjithashtu, Autoriteti Shtetëror për Informacionin Gjeohapësinor do të publikojë hartat në Gjeoportalin Kombëtar, ndërsa Agjencia Shtetërore e Kadastrës do të kryejë regjistrimin sipas ligjit.
Burim: ATSH
— Redaksia ZHURMA
