Çfarë tha Ali Ahmeti në Kuvendin e BDI-së në Kumanovë?

KUMANOVË — Kryetari i BDI-së, Ali Ahmeti, mori pjesë në Kuvendin Zgjedhor të Degës së partisë në Kumanovë, duke e cilësuar këtë tubim si një moment të rëndësishëm që dëshmon fuqinë organizative dhe pjekurinë politike të strukturave të BDI-së.

Ahmeti theksoi se e kaluara dhe kontributi i themeluesve të BDI-së përbëjnë bazën mbi të cilën ndërtohen fitoret politike të partisë. Ai vlerësoi emërimin e anëtarëve të Komitetit të Veteranëve, duke e cilësuar atë si mirënjohje të merituar për sakrificën dhe angazhimin e tyre ndër vite, duke shtuar se përvoja e tyre mbetet aset i çmuar dhe udhërrëfyes për gjeneratat që vijnë.

Ai falënderoi nëndegët dhe këshillat vendorë si shtyllat kryesore të organizimit dhe garancinë e lidhjes me qytetarët. Në thirrjen e tij për unitet dhe disiplinë organizative, Ahmeti deklaroi se vetëm përmes angazhimit të përbashkët mund të forcohet pozicioni politik i partisë dhe të mbrohen interesat e qytetarëve. "Bashkë do të vazhdojmë misionin tonë, më të vendosur se kurrë drejt fitoreve të reja", ka shkruar Ahmeti.

Burim: Tetova Sot
— Redaksia ZHURMA