Berisha i kërkon Veliajt kontribut për largimin e Edi Ramës nga qeveria

Kryetari i Partisë Demokratike, Sali Berisha, i ka bërë një ftesë të hapur kryetarit të Bashkisë së Tiranës, Erion Veliaj, për të dhënë kontributin e tij me qëllim largimin e kryeministrit Edi Rama. gjatë një bashkëbisedimi me ndjekësit në rrjetet sociale, kreu i opozitës sqaroi se në frontin kundër kreut të qeverisë mund të përfshihen të gjithë ata që e vlerësojnë atë si të keqen më të madhe të vendit.

Zhvillimi vjen gjatë një përplasjeje të hapur mes kryeministrit Edi Rama dhe kryebashkiakut Erion Veliaj, i cili është transferuar nga burgu i Durrësit në atë të Fierit. Gjatë bashkëbisedimit online, ndjekësit e pyetën kreun e PD-së lidhur me deklaratën e tij të mëparshme në Kukës, ku kishte thënë se armiku i armikut është aleat, duke e pyetur specifikisht se a hyn Veliaj në këtë kategori.

Në përgjigjen e tij, Berisha u shpreh se Partia Demokratike ka një kontribut të pamohueshëm në arrestimin e Veliajt, të cilin e cilësoi si një të burgosur hajdut. Ai sqaroi se kjo ftesë nuk përfaqëson një bashkim programor, por një përpjekje për të larguar pushtetin aktual. Për të ilustruar qëndrimin e tij, ai solli shembullin e Winston Churchill-it, i cili gjatë Luftës së Dytë Botërore u bashkua me Josif Stalinin për të mposhtur armikun kryesor.

Kreu i opozitës shtoi gjithashtu se është i gatshëm të bashkohet që nesër me çdo forcë politike që e kritikon atë personalisht, me kusht që të ketë të njëjtin qëllim politik. Berisha e cilësoi regjimin aktual si më të keq se diktaturat komuniste, naziste apo teokratike, duke u bërë thirrje qytetarëve të lexojnë teoritë e Huntington-it për diktaturën e bandave. Ai po ashtu akuzoi mediat e kontrolluara nga qeveria se përdorin gjuhë manipuluese dhe tha se PD ka një alternativë të certifikuar nga fondacionet Adenauer dhe Heritage.

Zërat:

«Në këtë listë hyjnë të gjithë ata, të cilët e konsiderojnë të keqen më të madhe për Shqipërinë, Edi Ramën. Erion Veliaj është një i burgosur hajdut aty ku është, dhe në arrestimin dhe krimet e tij, Partia Demokratike ka një kontribut të pamohueshëm. Por, edhe njëherë e them, cilido që dëshiron të kontribuojë në largimin e të keqes më të madhe, nuk është bashkim programor ky, jo», tha Berisha.

«Ëinston Churchill fitoi luftën me fuqinë ushtarake më të madhe të kohës sepse thirri bashkimin. Dhe u bashkua, me kë u bashkua? Me Josif Stalinin, diktatorin më gjakatar të të gjitha kohërave. Pra, duhet t’i dallojmë gjërat. Shqiptarët, ky regjim po i dëbon nga trojet e tyre, prandaj duhet të ikë një minutë e më parë. Po në qoftë se Veliaj jep kontribut, le të japë. Nuk ndaloj asnjërin», u shpreh ai.