Erion Braçe: Nuk kam negociuar me Ramën për t’u bërë ministër

Deputeti i Partisë Socialiste, Erion Braçe, ka reaguar përmes një videoje dhe një postimi në rrjetet sociale pas mbledhjes së Asamblesë së Partisë Socialiste, duke përgënjeshtruar shkrimet e ditëve të fundit. Ai ka hedhur poshtë pretendimet se ka negociuar me kryeministrin Edi Rama për të marrë drejtimin e Ministrisë së Bujqësisë apo për të lëvizur nga Bashkia e Tiranës.

Gjatë reagimit të tij, Braçe u është drejtuar dhjetëra mijëra votuesve në qarkun e Tiranës dhe në Bashkinë e Tiranës, duke theksuar se nuk i ka përdorur kurrë votat e tyre për pazare personale. Sipas tij, karriget nuk kanë qenë asnjëherë qëllim i tij, ndërsa ka përmendur mbështetjen e fituar që nga viti 1996 e këtej dhe ka vënë në dukje se gjithmonë është interesuar vetëm për punën.

Deputeti ka shprehur gjithashtu pakënaqësinë ndaj sulmeve dhe komenteve në portale e media online, duke lëshuar akuza ndaj atyre që, sipas tij, bëjnë pazare dhe përfitojnë nga paratë e pista, përfshirë edhe persona brenda Partisë Socialiste.