Berisha fton kundërshtarët në Kukës për aleancë kundër Edi Ramës

KUKËS — Kryetari i Partisë Demokratike, Sali Berisha, ka kërkuar krijimin e një aleance të gjerë kundër kryeministrit Edi Rama gjatë një takimi me militantët në Kukës, duke u bërë thirrje forcave politike opozitare dhe partive të reja që të bashkohen në këtë betejë për rrëzimin e qeverisë.

Gjatë takimit në kuadër të nismës «Ripërtëritja», ku ishin të pranishëm banorë të Kukësit, Hasit dhe Tropojës, kreu i PD-së mbrojti qëndrimin për bashkëpunim edhe me kundërshtarët politikë, duke theksuar se interesi kombëtar duhet të vendoset mbi atë partiak përballë asaj që e cilësoi si të keqen më të madhe të vendit.

Sipas Berishës, ky bashkim subjektesh do të shërbejë vetëm për largimin e kryeministrit Edi Rama nga pushteti dhe mbajtjen e zgjedhjeve të lira e të ndershme, ndërsa më pas secila parti do të ruajë identitetin e vet. «Armiku i armikut tim, është aleati im», tha Berisha, duke shtuar se qytetarët dhe partitë mund të bashkëpunojnë për të rrëzuar qeverinë dhe pastaj të mbeten sërish kundërshtarë.

Kryedemokrati shprehu gjithashtu mirënjohje për mbështetjen e votuesve në Kukës, Has e Tropojë, duke e quajtur atë votë për pluralizmin dhe dinjitetin e shqiptarëve përballë kërcënimeve të regjimit. Ai akuzoi gjithashtu qeverinë për korrupsion dhe dëbim të qytetarëve, duke pretenduar se njëzet e pesë për qind, përkatësisht nëntëdhjetë e pesë për qind e rritjes ekonomike përfundon në xhepat e karteleve të drogës dhe qeveritarëve.

Në vijim të fjalës së tij, Berisha premtoi se nëse Partia Demokratike vjen në pushtet, do të ndërmarrë një betejë frontale kundër krimit të organizuar dhe do të sekuestrojë çdo pasuri të paligjshme të politikanëve që u është vjedhur qytetarëve dhe pensionistëve.