Veliaj: Edi Rama është kthyer në pengesë për reformimin e Partisë Socialiste

Kryetari i Bashkisë së Tiranës, Erion Veliaj, ka kërkuar zyrtarisht nga anëtarët e Asamblesë Kombëtare të Partisë Socialiste aktivizimin e procedurës statutore për mocion mosbesimi ndaj kryetarit të partisë, Edi Rama. Përmes një letre të dërguar në telefonat e anëtarëve nga burgu i Fierit, Veliaj pretendon se Rama është kthyer në pengesën kryesore për reformimin e partisë dhe akuzon atë për ndërhyrje politike në administrimin e kryeqytetit.

Kjo kërkesë vjen pasi më parë u bë me dije publikisht thirrja e tij që organet drejtuese të njoftojnë procedurat statutore për mocionin, me qëllim hapjen e një debati të brendshëm në forume. Veliaj kishte kërkuar gjithashtu të merrte pjesë drejtpërdrejt në mbledhjen e sotme të Asamblesë Kombëtare në Gjirin e Lalëzit, e cila nis në orën 10:30 dhe zhvillohet pas afro nëntë muajsh nga hera e fundit. Megjithatë, kërkesa e tij për pjesëmarrje fizike nuk u miratua nga autoritetet, çka e shtyu atë t'ua përcjellë qëndrimin socialistëve me shkrim.

Në letrën e tij me titull «Partia Socialiste është më e madhe se kryetari i saj», Veliaj deklaron se vendimmarrja në parti është përqendruar në duart e një apo dy individëve, duke dobësuar rolin e meparshëm të forumit drejtues. Ai akuzon se gjatë qëndrimit të tij prej 21 muajsh në paraburgim, kryeministri Rama ka ushtruar presion politik mbi administratën e Bashkisë së Tiranës për të larguar bashkëpunëtorë të tij që gëzonin mbrojtje ligjore. Sipas Veliajt, në shtator 2025 Këshilli Bashkiak propozoi shkarkimin e tij nën presionin e drejtpërdrejtë të kryeministrit, vendim që më pas u miratua nga Këshilli i Ministrave dhe që ai e ka ankimuar në Gjytetin Kushtetuese.

Veliaj shkruan se e nisi bashkëpunimin me Edi Ramën në një kohë kur kryetarit aktual i mbylleshin dyert në Pallatin e Kulturës gjatë Asamblesë së Lezhës, nga të njëjtët njerëz që sipas tij vendosin edhe sot në parti. Ai shton se pasi bëri gavetën politike nga viti 2009 deri në vitin 2013 pa mandat deputeti, ka arritur të fitojë gjashtë fushata në Tiranë dhe të marrë tri mandate në krye të bashkisë. Ish-ministri kujton gjithashtu drejtimin e fushatës elektorale në Qarkun e Gjirokastrës, duke theksuar se besimi brenda forcës politike duhet të fitohet me punë në terren dhe jo përmes emërimeve apo besnikërisë personale.

Lidhur me hapat e ardhshëm brenda forcës politike, Veliaj kërkon që organet përgjegjëse të bëjnë me dije procedurën, afatet dhe mënyrën e ushtrimit të të drejtës së mocionit të mosbesimit. Ai kërkon që anëtarët e Partisë Socialiste të shprehen sipas rregullave të statutit për të mundësuar ndryshimin e modelit të drejtimit.

«Edi Rama ka qenë një reformator i rëndësishëm i Partisë Socialiste. Por unë besoj se sot ai është kthyer në pengesën kryesore për reformimin e saj. Nuk mund të presim që një sistem i përqendruar te vullneti i një individi të korrigjohet vetëm nga vullneti i po atij individi», shkruan Veliaj në letrën e tij drejtuar Asamblesë Kombëtare.