Sa do të financojë BE ruajtjen e trashëgimisë kulturore në Shqipëri?

— Bashkimi Evropian do të shpërndajë gjithsej 60 mijë euro për mbrojtjen dhe promovimin e trashëgimisë kulturore në Shqipëri, përmes skemës së nëngrantimit të projektit “CulturAL”. Delegacioni i BE-së në Tiranë konfirmoi nënshkrimin e kontratave me 10 organizata të shoqërisë civile, ku secila do të përfitojë një financim prej 6 mijë eurosh.

Iniciativat synojnë përfshirjen e të rinjve dhe komuniteteve lokale në dokumentimin e pasurisë materiale dhe jomateriale. Organizatat si “ANTIGONEA” do të fokusohen te legjendat e zonës së Vjosës, ndërsa “CEI” dhe “INAC” do të monitorojnë qeverisjen e Kalasë së Bashtovës dhe Qendrës Historike të Elbasanit.

Strategjia e financimit përfshin diversitet të madh, nga dokumentimi i valleve tradicionale në Lezhë, Librazhd dhe Fier nga “MEGAART”, deri te krijimi i profileve digjitale për 30 monumente kulturore nga “TRAKULT”. Organizata “KAZUS” do të krijojë video-histori për shtëpitë monument të Korçës, ndërsa “POEC” do të përgatisë dosje për Regjistrin Kombëtar në Dibrë.

Përveç dokumentimit, projekte të tjera si ato të “NATGA”, “NORTH GREEN ASSOCIATION” dhe “SHARM” do të përdorin teknologji moderne dhe art për angazhimin e të rinjve. Ky proces synon forcimin e rolit të shoqërisë civile në mbrojtjen e vlerave kulturore të vendit.

Burim: Gazeta Tema
— Redaksia ZHURMA