Si e riktheu një shqiptar flamurin gjigand në Nju Jork pas 50 vitesh?

Alesio Bejleri, një student me origjinë shqiptare që jeton në Amerikë prej 10 vitesh, është nismëtari i rikthimit të flamurit gjigand amerikan mbi Urën Verrazzano në Nju Jork. Ky simbol patriotik rikthehet për të shënuar festimet madhështore të 250-vjetorit të Pavarësisë së Shteteve të Bashkuara.

Bejleri, i lindur dhe rritur në Itali si djali i vetëm i një familjeje shqiptare, u frymëzua pas një vizite në muze. Aty mësoi se një flamur i ngjashëm ishte vendosur mbi të njëjtën urë në vitin 1976 për 200-vjetorin e Pavarësisë, dhe u prekul nga rrëfimi i një të moshuari që kishte udhëtuar qindra kilometra për ta parë.

Realizimi i këtij objektivi ambicioz zgjati më shumë se një vit. Gjatë kësaj periudhe, ai zhvilloi takime, dërgoi letra dhe nisi një fushatë komunikimi me përfaqësues lokalë, institucione dhe politikanë amerikanë për të siguruar mbështetjen e nevojshme për projektin.

Sipas deklaratave të tij, procesi ishte i vështirë pasi fillimisht ideja u konsiderua e bukur, por pa veprime konkrete. Bejleri tregon se përballu me refuzime të shumta, por nuk u dorëzua deri në momentin kur mori përgjigjen pozitive që lejoi nisjen e instalimit të flamurit.

Ndryshe nga versioni i vitit 1976, flamuri i ri do të vendoset mbi një strukturë të posaçme çeliku, e projektuar specifikisht për t’i bërë ballë erërave të forta, të cilat dikur shkaktuan dëmtimin e flamurit origjinal.

Ky flamur gjigand do të shërbejë si pikë referimi për dhjetëra anije historike që do të hyjnë në portin e Nju Jorkut në kuadër të festimeve “America250”, duke e kthyer instalimin në një nga simbolet kryesore të 4 Korrikut.

Përmes këtyre përpjekjeve, Bejleri arriti të bindte institucionet amerikane për rikthimin e një relike kombëtare në një formë të përditësuar.

Burim: ABC News
— Redaksia ZHURMA