Akademi përkujtimore në Skenderaj për Idriz Rrecajn pas identifikimit të eshtrave

Në Skenderaj është mbajtur akademi përkujtimore në kujtim të Idriz Rrecajt, i cili u rrëmbye dhe u zhduk me dhunë në prill të vitit 1999, ndërsa rivarrosja e tij do të bëhet të premten pasi eshtrat u identifikuan së fundmi përmes analizave të ADN-së.

Shpëtim Rrecaj, djali i Idriz Rrecajt, u shpreh para të pranishmëve se familja më në fund ka marrë një përgjigje pas 27 vjetësh kërkimi. «Për 27 vjet familjen tonë e ka përcjellë pyetja “ku është babai juaj Idriz Rrecaj?” Sot më në fund e kemi një përgjigje, babai im po kthehet në tokën e Kosovës së lirë për të cilën jetoi dhe sakrifikoi», ka deklaruar ai, duke shtuar se gjetja e eshtrave dëshmon se e vërteta nuk mund të zhduket. Homazhe u bënë gjithashtu pranë arkivolit të tij.

Idriz Rrecaj ishte intelektual, veprimtar dhe një nga themeluesit e degës së Lidhjes Demokratike të Kosovës në Skenderaj, i cili u mor bashkë me 22 intelektualë të tjerë në prill të vitit 1999. Gjatë luftës ai ishte angazhuar edhe në Ushtrinë Çlirimtare të Kosovës si këshilltar i Jetullah Gecit, komandant i Brigadës 112 «Arben Haliti».