Kurti viziton familjet e Salih Mëziut dhe Idriz Rrecajt

Kryeministri i Kosovës, Albin Kurti, i shoqëruar nga ministri për Punë, Familje dhe Vlerat e Luftës Çlirimtare, Andin Hoti, ka vizituar familjet e veprimtarëve Salih Mëziu dhe Idriz Rrecaj në Marinë dhe në Llaushë të Skenderajt. Të dy këta veprimtarë ishin pjesë e «Grupit të Intelektualëve», të cilët u rrëmbyen dhe u zhdukën me dhunë nga forcat e armatosura serbe në muajin prill të vitit 1999.

Mbetjet mortore të Salih Mëziut dhe Idriz Rrecajt u gjetën në një varrezë masive në Zubin Potok dhe u identifikuan javë më parë nëpërmjet analizave të ADN-së. Kryeministri Kurti deklaroi se këto dy familje, njësoj sikurse familja e Adem Beqirit i cili u varros më 3 tetor, kanë marrë përgjigje për fatin e të afërmve të tyre, por ende kanë nevojë për drejtësi.

Gjatë këtyre vizitave, u theksua se dhimbja dhe pritja përplot ankth vazhdojnë të jenë të mëdha për më të dashurit e më shumë se 1.500 personave të tjerë, të cilët vazhdojnë të jenë të zhdukur nga lufta e fundit në Kosovë. Lidhur me këtë situatë, u kërkua trysni ndërkombëtare mbi Serbinë, e cila u akuzua se mbron e glorifikon kriminelët, fsheh e mohon krimet, si dhe mbyll e klasifikon dosjet duke vazhduar me mendësinë e viteve të nëntëdhjeta.

Sipas vlerësimeve të shfaqura gjatë këtyre takimeve, presioni ndërkombëtar ndaj Serbisë nuk është vetëm i domosdoshëm, por përbën edhe të vetmën mënyrë për zbardhjen e fatit të personave të zhdukur me dhunë dhe për t'i dhënë shans vendosjes së drejtësisë për viktimat e luftës.