Afati i fundit për pagesën e K-15 është 31 dhjetori

Punëdhënësit në sektorin privat kanë edhe pak më shumë se dy muaj kohë për të përmbushur detyrimin e pagesës së regresit për pushim vjetor, i njohur si K-15. Shuma minimale për këtë vit llogaritet rreth 19.560 denarë, ndërsa afati i fundit për kryerjen e këtij transaksioni është caktuar data 31 dhjetor, kurse procesi i pagesave ka nisur që më 1 korrik. Të drejtë për këtë kompensim të detyrueshëm vjetor, që u ndihmon punonjësve financiarisht për shpenzimet e pushimeve, kanë personat që gjatë vitit kalendarik numërojnë të paktën gjashtë muaj marrëdhënie të pandërprerë pune te i njëjti punëdhënës, pavarësisht nëse e kanë shfrytëzuar tashmë pushimin e tyre.

Vlera e K-15 nuk paraqitet si shifër fikse, por mbështetet në pagën mesatare neto në vend gjatë tre muajve të fundit para muajit të pagesës, ku minimumi përbën 40 për qind të pagës mesatare mujore neto dhe mund të ndryshojë varësisht nga koha e ekzekutimit të pagesës. Megjithatë, kompanitë mund të ndajnë edhe shuma më të larta në përputhje me marrëveshjet kolektive. Për shkelësit që nuk e respektojnë këtë detyrim ligjor, si dhe për rastet kur punëdhënësi e derdh regresin te punëtori dhe më pas e detyron t'ia kthejë paratë në dorë, parashikohen gjoba në para si dhe dënim me burg deri në një vit në kushte të përcaktuara me ligj.