Kreditimi në Maqedoninë e Veriut shënon rritje vjetore prej 14.1 për qind

Sektori financiar në vend vazhdon zgjerimin me ritme më të shpejta të huadhënies sesa të depozitave. Sipas të dhënave të Bankës Popullore, kreditë e përgjithshme shënuan rritje vjetore prej 14,1 për qind gjatë muajit shtator, duke u rritur gjithashtu për 1,3 për qind në raport me muajin gusht.

Zgjerimi i portofolit kreditor vërehet si te qytetarët, ashtu edhe te ndërmarrjet. Brenda ekonomive familjare, rritjen më të madhe vjetore e regjistruan kreditë për banim me 16,1 për qind, të ndjekura nga kreditë konsumatore me 12,4 për qind dhe kreditë e përgjithshme familjare me 12,7 për qind. Ndërkohë, kreditë për bizneset u shtuan për 15,7 për qind krahasuar me shtatorin e vitit të kaluar, ndërsa kjo rritje erdhi kryesisht nga kreditimi në denarë, bashkë me rritjen e huave në valutë të huaj.

Në të njëjtën periudhë, depozitat bankare u rritën me 9,2 për qind në bazë vjetore, ku kursimet e qytetarëve shënuan të njëjtën normë rritjeje kurse ato të ndërmarrjeve u shtuan për 8,6 për qind. Në përfundim të shtatorit, detyrimet e papaguara totale të qytetarëve dhe kompanive ndaj bankave arritën në rreth 9,87 miliardë euro.