DAP nis kontrollet për të ardhurat e fituara nga jashtë gjatë vitit 2021

Drejtoria e të Ardhurave Publike ka nisur verifikimin e të dhënave të siguruara nga bankat për paratë që qytetarët rezidentë në Maqedoninë e Veriut kanë pranuar nga jashtë vendit gjatë vitit 2021. Institucioni u ka dërguar njoftime individuale personave fizikë me ftesë për të përmbushur detyrimet e tyre tatimore brenda afatit të caktuar.

Kjo nismë përbën vazhdimësinë e kontrolleve të zbatuara më herët nga ky institucion. Në ftesën e mëparshme, autoritetet tatimore kryen verifikime për qytetarët që kishin realizuar të ardhura jashtë vendit gjatë vitit 2020, me fokus të veçantë te personat që kishin punuar në Irak dhe Afganistan.

Sipas sqarimeve nga Drejtoria e të Ardhurave Publike, jo çdo transfer i kryer nga jashtë i nënshtrohet automatikisht tatimit në Maqedoninë e Veriut. Detyrimi tatimor zbatohet mbi të ardhurat e përcaktuara me Ligjin për tatimin mbi të ardhurat personale, ku hyjnë pagat, kontratat për punë, honoraret, shërbimet intelektuale dhe puna e lirë apo frilens. Gjithashtu, tatimit i nënshtrohen të ardhurat e fituara nga krijuesit në platformat si Youtube e Tiktok, dhënia e patundshmërive me qira, përfshirë shërbimet përmes Airbnb apo Booking, si dhe fitimet nga shitja e pasurive të patundshme, kriptovalutat, dividentët, interesat apo kamatat, të drejtat autoriale dhe lojërat e fatit. Nga ana tjetër, paratë e dërguara si dhuratë, ndihmë familjare, hua ose përmes shërbimeve të transferimit të parave si Western Union, Ria dhe MoneyGram nuk tatohen automatikisht. Institucioni bën me dije se trajtimi varet nga arsyeja e transferit dhe, kur kërkohet, qytetarët duhet të paraqesin dëshmi që vërtetojnë bazën e pranimit të mjeteve.

Në rast se obligimet tatimore nuk përmbushen në mënyrë vullnetare, Drejtoria e të Ardhurave Publike paralajmëron marrjen e masave ligjore për përcaktimin e tatimit, si dhe nisjen e procedurave të mundshme kundërvajtëse, tatimore apo penale. Qytetarët që kanë pranuar mjete duhet të kontrollojnë statusin e tyre, të dorëzojnë llogaritjen elektronike të tatimit paraprak përmes sistemit e-PDD dhe të kryejnë pagesat përkatëse. Për ndihmë dhe udhëzime shtesë, institucioni vë në dispozicion adresën e postës elektronike info@ujp.gov.mk, numrin e telefonit pa pagesë 0800 33 000, linjën 02 3253 200, si dhe shërbimet në faqen zyrtare ose në zyrat rajonale sipas vendbanimit.

Në njoftimin e saj zyrtar, Drejtoria e të Ardhurave Publike theksoi: «DAP ka dorëzuar njoftime të personalizuara deri te personat fizik rezident për të cilët ka të dhëna se kanë fituar nga jashtë vendit gjatë vitit 2021, që në afat të caktuar të përmbushin obligimet tatimore. Gjatë vitit disa herë kemi bërë thirrje deri te qytetarët që të përmbushin detyrimet, me çka u dhanë dhe sqarime e udhëzime shtesë.»