Motra e Erjon Vishkullit thotë se familja e çoi në Itali për kurim

Motra e 28-vjeçarit Erjon Vishkulli ka reaguar publikisht për të sqaruar se transferimi i të riut në Itali për trajtim mjekësor është bërë me kursimet dhe përpjekjet e familjarëve dhe miqve, duke hedhur poshtë pretendimet se shteti shqiptar ka mundësuar dërgimin e tij jashtë vendit.

Erjon Vishkulli u plagos rëndë në syrin e majtë nga një plumb gome gjatë protestës së 24 tetorit në Tiranë, ndërsa ngjarja ka ngritur shqetësime të mëdha te familjarët, të cilët shpresojnë që ndërhyrja e specializuar në shtetin italian t'i shpëtojë shikimin të riut.

Përmes një postimi në Instagram, motra e të riut, Rubi Vishkulli, ka sqaruar se dërgimi për kurim është realizuar falë mbështetjes financiare dhe iniciativës së njerëzve që u erdhën në ndihmë, duke përgënjeshtruar deklaratën e kryeministrit Edi Rama, i cili u shpreh se kishte dhënë udhëzime për mbulimin e shpenzimeve të ndërhyrjeve mjekësore.

Familjarët bëjnë thirrje që vëmendja të mbetet te shëndeti i të riut dhe kërkojnë nga portalet që të mos shpërndajnë informacione të pavërteta apo ta përdorin situatën për përfitime politike, duke theksuar se dëshira e tyre e vetme është kthimi i tij në shtëpi shëndoshë e mirë për t'ia gëzuar zemrën prindërve.

Në mesazhin e saj drejtuar publikut, ajo shtoi: «Ju falënderojmë të gjithëve që jeni interesuar dhe shqetësuar për shëndetin e vëllait tonë, por duam që në këto momente të qëndrojmë larg pjesës politike».

Duke akuzuar kryeministrin për tentativë për t'u bërë protagonist, ajo përsëriti thirrjen: «Mos ndani lajme pa bazë për shikime apo mashtrime e propaganda të Ramës, për të dalë protagonist i ngjarjes vetë dhe për ta kthyer çështjen në politike, duke deklaruar që ka dhënë urdhër për të mbuluar shpenzimet e operacioneve».

Në përmbyllje të reagimit të saj emocional, ajo shkroi: «STOP FAKE NEWS! E kanë çuar familja, miqtë dhe mbështetësit e familjes tonë dhe JO SHTETI. Shpërndani lajme të sakta».