Maqedoni e Veriut me flotën e automjeteve më të vjetër në rajon

Maqedonia e Veriut posedon flotën më të vjetër të automjeteve ndër vendet e përfshira në analizën e “Al Jazeera Balkans”, ku mosha mesatare e veturave arrin në 19,4 vjet. Gjatë periudhës nga viti 2012 deri më 2024, numri i automjeteve të regjistruara është dyfishuar nga rreth 350 mijë në afro 700 mijë, por mosha mesatare ka mbetur e pandryshuar. Statistikat tregojnë se për çdo 1.000 banorë regjistrohen rreth 383 automjete, ndërsa 87,9 për qind e tyre janë më të vjetra se shtatë vjet.

Kjo moshë mesatare tejkalon ndjeshëm mesataren e Bashkimit Evropian prej 12,7 vjetësh. Në krahasim me vendet e tjera të rajonit, Kosova ka një moshë mesatare prej 18 vjetësh, Greqia 17,3 vjet, Mali i Zi 17,06 vjet, Kroacia 14,63 vjet dhe Sllovenia 11,2 vjet. Importi masiv i veturave të përdorura nga Gjermania dhe Italia, si dhe fuqia e kufizuar blerëse e qytetarëve për të blerë automjete të reja, mbeten ndër arsyet kryesore të kësaj gjendjeje.

Përballë këtij fenomeni, shtetet e rajonit kanë ndërmarrë masa të ndryshme, ku Bosnja e Hercegovina dhe Mali i Zi kanë ndaluar disa kategori të automjeteve të vjetra me naftë, ndërsa Serbia lejon ende importin e veturave më të vjetra se 20 vjet.