Britani: Dënohen dy shqiptarë për kokainë dhe paund të fshehura

Dy shtetas shqiptarë janë dënuar me burg në Britaninë e Madhe pasi u shpallën fajtorë për përfshirje në shpërndarjen e kokainës në qytetin Stoke-on-Trent. Sipas Policisë së Staffordshire, Mikele Bilali, 26 vjeç, dhe Ervin Hasa, 25 vjeç, dolën më 2 tetor përpara Gjykatës së Kurorës në Stoke-on-Trent, ku morën masat e dënimit pasi pranuan akuzat.

Bilali u dënua me 1 vit e 10 muaj burg për posedim të kokainës me qëllim shpërndarjen, drejtim të automjetit pa leje dhe pa siguracion, ndërsa Hasa u dënua me 3 vite burg për posedim të kokainës me qëllim shpërndarjen dhe posedim të pasurisë kriminale. Hetimet kishin nisur gjatë një patrullimi në zonën Boothen, ku efektivët ndaluan një automjet Mercedes të drejtuar nga Bilali.

Gjatë kontrolleve në automjet, në një banesë dhe gjatë masave të sigurisë, autoritetet sekuestruan gjithsej 241 qese me kokainë me vlerë rreth 9.500 paundësh në treg, si dhe më shumë se 11.900 paund në para të gatshme, një pjesë e të cilave ishin fshehur në një çantë Gucci brenda mobilies së televizorit. Kryeinspektori Steve Morrey deklaroi se policia do të vijojë operacionet kundër trafikut të drogës në zonë.