Abdixhiku mohon akuzat e Muhaxherit për pazare me poste ministrore
Kryetari i LDK-së u betua solemnisht para delegatëve në Kuvend, duke i cilësuar shpifje deklaratat e kryetarit të Pejës, Gazmend Muhaxheri.
PRISHTINË — Kryetari i Lidhjes Demokratike të Kosovës (LDK), Lumir Abdixhiku, ka mohuar akuzat se ka premtuar poste ministrore në këmbim të mbështetjes për të mbajtur pozitën e kryetarit. Gjatë fjalës së tij në Kuvendin e jashtëzakonshëm, Abdixhiku i cilësoi si shpifje pretendimet e tilla që janë përdorur javët e fundit.
Deklaratat e tij i drejtoheshin kryetarit të Pejës, Gazmend Muhaxheri, i cili e kishte akuzuar atë për ofrim të posteve ministrore në këmbim të mbështetjes. Abdixhiku u shpreh i zhgënjyer me gjuhën publike të përdorur brenda lidershipit, duke theksuar se shpifja dhe nxitja nuk kanë qenë kulturë politike dhe se në mendësinë rugoviane nuk akuzohet pa asnjë provë.
Para 355 delegatëve të pranishëm, kryetari i LDK-së bëri një betim solemn për të hedhur poshtë këto akuza. Ai u betua në Zot, atdhe e familje se diçka e tillë nuk ka ndodhur, duke iu përgjigjur kështu atyre që javëve të fundit kërkuan largimin e tij nga pozita e kryetarit të partisë.
Burim: Insajderi
— Redaksia ZHURMA