LDK-ja vendos sot fatin e Abdixhikut me votim të fshehtë
355 delegatë votojnë sot me votë të fshehtë; sekretari i përgjithshëm Ilir Ferati e quan ushtrimin më të mirë të demokracisë.
PRISHTINË — LDK-ja mban sot Kuvendin e Jashtëzakonshëm me një pikë të vetme në rendin e ditës: 355 delegatë do të vendosin me votë të fshehtë nëse Lumir Abdixhiku do të vazhdojë ta udhëheqë partinë, apo do të shkarkohet.
Para nisjes së punimeve, sekretari i përgjithshëm i LDK-së, Ilir Ferati, vlerësoi se LDK-ja po tregohet si shtëpi e debatit demokratik e politik, teksa tha se të drejtën demokratike e dëshmon pikërisht votimi i fshehtë mbi mocionin e shkarkimit, të ngritur nga pjesa e delegatëve iniciues që kanë plotësuar kushtin statutar për të thirrur një Kuvend të tillë.
Sipas Feratit, kërkesa është trajtuar në afat rekord nga kryesia e partisë, duke respektuar normat statutore dhe pa e konsumuar në tërësi afatin prej 60 ditësh — Kuvendi po mbahet vetëm në ditën e 15-të. Ai tha se organizimi teknik ka përfunduar dhe se delegatët priten të mbërrijnë nga ora 18:00 për të nisur punimet.
I pyetur nëse pritet shumicë pro apo kundër shkarkimit, Ferati e shmangi përgjigjen e drejtpërdrejtë, duke thënë vetëm se qëndrimet e tij janë të qarta, dhe shprehu shpresë se Kuvendi do të rrjedhë në mënyrë demokratike.
Burim: Koha.net
— Redaksia ZHURMA