Copernicus: Viti 2026 mund të jetë i dyti më i nxehtë në histori

Bota ndodhet në rrugën e duhur që viti 2026 të shënohet si i dyti më i nxehtë në histori, ndërsa fenomeni klimatik El Ninjo po përshpejton ngrohjen globale të nxitur nga njeriu, sipas Shërbimit për Ndryshimin e Klimës, Copernicus, i cili njoftoi se ky vit ka njëzet për qind shans të barazojë ose të tejkalojë vitin 2024, i cili mban rekordin e temperaturave më të larta të regjistruara deri më tani.

Sipas të dhënave të publikuara nga shërbimi evropian i monitorimit të klimës, ngrohja globale po vijon me ritme të shpejta, ndërsa mesatarja e temperaturave nga viti 2023 deri në vitin 2026 po ashtu pritet të kalojë pragun prej 1.5 gradë Celsius, që paraqet limitin e caktuar në bazë të Marrëveshjes së Parisit për klimën për të shmangur ndikimet negative nga ndryshimet klimatike.

Monitoruesi i klimës i Bashkimit Evropian bëri të ditur se temperaturat globale gjatë këtij viti do të tejkalojnë me shumë siguri pragun prej 1.5 gradë Celsius të niveleve paraindustriale, ndërsa bota ka përjetuar tetorin më të nxehtë në histori, me temperaturën mesatare globale të ajrit që arriti në 1.75 gradë Celsius mbi nivelet paraindustriale të periudhës 1850-1900, duke shënuar muajin e tretë me radhë me temperatura mbi pragun prej 1.5 gradë Celsius.

Samantha Burgess, drejtuese për klimën në Qendrën Evropiane për Parashikimet e Motit, qendër që operon me Copernicus-in, deklaroi se në tetor vazhdoi prirja për ngrohje globale, me temperatura rekord të regjistruara në botë dhe në oqeane. Ajo shtoi se një fenomen jashtëzakonisht i fuqishëm El Ninjo po rrit nxehtësinë në ngrohjen globale e cila tashmë është shkaktuar nga aktivitetet e njeriut.

Ekspertët theksuan se ky fenomen mund të kontribuojë që viti 2027 të vendosë një rekord të ri temperaturash, ndërsa parashikuesit globalë të motit paralajmëruan se ky El Ninjo, që pritet të arrijë kulmin më vonë gjatë këtij viti, mund të jetë fenomeni më i fuqishëm i regjistruar ndonjëherë, i cili ka rritur temperaturat në zonën e Paqësorit dhe ka shtuar rreziqet për thatësira, vërshime dhe valë ekstreme të të nxehtit.

Njoftimi nga shërbimi evropian vjen ndërsa vendet po përgatiten të takohen në fillim të javës së ardhshme në Turqi për samitin dyjavor COP31 të Kombeve të Bashkuara për ndryshimet klimatike, një ngjarje që pason një vit të shënuar nga vërshime, zjarre masive dhe valë të të nxehtit në pjesë të ndryshme të botës, përfshirë përmbytjet vdekjeprurëse në Nepal dhe zjarret në Indonezi.