86 mijë vizitorë në Qendrën Muzeore të Krujës në gjashtë muaj

KRUJË — Qendra Muzeore e Krujës mbetet një nga destinacionet më të frekuentuara të turizmit kulturor në vend, me një numër të lartë vizitorësh çdo ditë gjatë sezonit veror. Në 6 muajt e parë të vitit, komplekset e saj kanë mirëpritur 86 mijë vizitorë, sipas drejtorit të Muzeut Kombëtar “Gjergj Kastrioti Skënderbeu” dhe Muzeut Etnografik Krujë, Mehdi Hafizi.

Sipas Hafizit, interesi i turistëve është rritur ndjeshëm në këta 6 muaj, ku vetëm Muzeu Etnografik është vizituar nga 13 mijë vizitorë. “Këtë sezon po përjetojmë një fluks të kënaqshëm vizitorësh”, tha ai, duke shtuar se ata vijnë nga vende të ndryshme të botës dhe tregojnë interes të veçantë për historinë e Skënderbeut, rezistencën shqiptare dhe trashëgiminë kulturore.

Turistët vijnë kryesisht nga Franca, Spanja, Italia, Izraeli, Polonia, Austria, Gjermania dhe Shtetet e Bashkuara, thotë Hafizi. Shumë prej tyre largohen me përshtypje shumë pozitive dhe e konsiderojnë vizitën në Krujë një nga përvojat më të veçanta gjatë qëndrimit në Shqipëri.

Hafizi thekson se muzeu po punon vazhdimisht për të përmirësuar përvojën e vizitorëve, përmes shërbimeve informuese dhe ruajtjes së standardeve të ekspozimit të objekteve historike. “Synimi ynë është që çdo vizitor të largohet jo vetëm me njohuri më të plota për historinë e vendit, por edhe me dëshirën për t’u rikthyer sërish në Krujë”, tha drejtori i muzeut.

Qendra Muzeore e Krujës, e vendosur brenda kalasë historike, përfshin Muzeun Kombëtar “Gjergj Kastrioti Skënderbeu” dhe Muzeun Historik dhe Etnografik, si dhe Pazarin e Vjetër, ku artizanët lokalë ofrojnë produkte tradicionale. Komplekset mbeten një nga pikat më të vizituara në Shqipëri për promovimin e historisë dhe identitetit kombëtar.

Burim: ATSH
— Redaksia ZHURMA