Si u shpëtua jeta e një 52-vjeçari pas infarktit masiv?

VITI — Një pacient 52-vjeçar u shpëtua nga vdekja pas një infarkti masiv të zemrës dhe arrestit kardiak, falë një zinxhiri ndërhyrjesh të shpejta. Ngjarja nisi në Urgjencën Primare të QKMF-së në Viti, ku mjekët dr. Ardi Ademi dhe dr. Imer Ramadani konfirmuan diagnozën përmes një elektrokardiogramë (EKG) dhe nisën menjëherë terapinë emergjente.

Pas transferimit me autoambulancë drejt Spitalit Rajonal të Gjilanit, gjendja e pacientit u rëndua dhe ai pësoi arrest kardiak. Ekipi mjekësor në Gjilan, nën udhëheqjen e dr. Begush Canaj, nisi procedurat e reanimimit në një situatë kritike ku fibrilacioni ventrikular përsëritej çdo pesë minuta.

Mjekët në Gjilan kryen rreth 16 defibrilime për të rikthyer pacientin në ritmin e duhur të zemrës. Ky proces i intensifikuar i reanimimit, i cili i shpëtoi jetën 52-vjeçarit, mundësoi stabilizimin e parë të gjendjes së tij shëndetësore përpara se të transferohej më tej.

Hapi final i shpëtimit ndodhi në Qendrën Klinike Universitare të Kosovës (QKUK), ku pacienti iu nënshtrua një koronarografie. Gjatë procedurës u zbulua një bllokim i arteries së majtë të zemrës, ndaj të cilës iu vendos një stent për të siguruar rrugën e gjakut, duke e nxjerrë pacientin nga zona e rrezikut.

Aktualisht, pacienti vazhdon trajtimin në Klinikën Intensive të Kardiologjisë dhe raportohet se gjendja e tij është stabile. Rasti dëshmon se koordinimi i shpejtë mes QKMF-së, spitalit rajonal dhe QKUK-së është vendimtar kur çdo sekondë përcakton mbijetesën e një njeriu.

Burim: Almakos
— Redaksia ZHURMA