Krerët e partive të reja shprehin qëndrime të ndryshme për bashkëpunimin

Krerët e partive të reja politike në Shqipëri kanë shprehur skepticizëm dhe qëndrime të ndryshme lidhur me mundësinë e daljes me një kandidat të përbashkët në zgjedhjet lokale. Gjatë një debati televiziv në emisionin «Të Paekspozuarit» të gazetarit Ylli Rakipi në Vizion Plus, kryetari i Lëvizjes Bashkë, Arlind Qori, drejtuesi i lëvizjes «Shqipëria Bëhet», Adriatik Lapaj, si dhe kreu i Partisë Mundësia, Agron Shehaj, shkëmbyen replika dhe batuta për bashkëpunimin opozitar.

Diskutimi u fokusua te mundësia e mbështetjes së një kandidati të pavarur të dalë nga protestat apo nga lëvizjet studentore për Bashkinë e Tiranës. Në përplasjet mes tyre, përfaqësuesit e forcave të reja politike treguan qartë se arritja e një koalicioni apo emëruesi të përbashkët mbetet një proces me sfida të mëdha.

Lidhur me mundësinë e bashkëpunimit, kryetari i Lëvizjes Bashkë, Arlind Qori, deklaroi se krijimi i një kandidati të përbashkët i duket iluzion, duke argumentuar se protestat kanë emërues të përbashkët rrëzimin e qeverisë, por nuk do të ketë unanimitet kur të vihet te listat. Ai shtoi se nëse një kandidati nga protesta i bashkohet Sali Berisha, ai shndërrohet në kandidat të tij. Nga ana tjetër, kryetari i Partisë Mundësia, Agron Shehaj, tha se është më optimist dhe se bashkëpunimi mund të ndodhë, duke theksuar se forca e tij është e hapur për bashkëpunim nëse del një kandidat nga studentët apo nga ndonjë organizatë e pavarur. Ndërkohë, drejtuesi i «Shqipëria Bëhet», Adriatik Lapaj, ngriti çështjen e parimeve dhe nismave ligjore, duke deklaruar se ka nisur një referendum për Paketën e Maleve dhe investimet strategjike, por zoti Shehaj dhe zoti Qori nuk e kanë firmosur atë.

Përveç debatit për modelin e kandidimit, liderët e partive përmendën edhe protestat e zhvilluara në muajin dhjetor para Kryeministrisë dhe organizimet sindikale e studentore, duke bërë krahasime edhe me lëvizjet në Serbi.