Van Gerven Oei: Në polici donin të më lidhnin me Antifa-n

Gazetari dhe shkrimtari holandez Vincent van Gerven Oei, i cili jeton dhe punon në Tiranë, është ndaluar nga Policia e Shtetit gjatë protestave në kryeqytet, duke qëndruar i shoqëruar për pesë orë në komisariat, periudha maksimale e lejuar për këtë procedurë, ndërsa autoritetet dyshohet se u përpoqën të krijonin një shkak artificial duke diskutuar lidhjen e tij të mundshme me grupimin Antifa për t'i dhënë zë teorive zyrtare.

Ngjarja ka ndodhur gjatë zhvillimit të protestave në Tiranë, ku gazetari holandez u shoqërua nga efektivët e policisë edhe pse, sipas dëshmisë së tij, autoritetet e kishin shumë të qartë se kishin të bënin me një shkrimtar dhe gazetar që ushtron aktivitetin e tij në vend.

I ftuar në emisionin «Ora 19» në SYRI TV, me moderatoren Armela Ferko, van Gerven Oei ka deklaruar se efektivët që e shoqëruan në fillim mund të mos kishin dijeni për arsyet e vërteta, por sipas burimeve të tij brenda Policisë së Shtetit, brenda komisariatit situata u diskutua krejt ndryshe për të arsyetuar mbajtjen e tij. Ai u shpreh se kjo përfaqësonte një përpjekje për të sajuar një arsye dhe për t'i dhënë mbështetje teorisë së kryeministrit Edi Rama lidhur me protestat në Tiranë. Përveç rastit të tij, gazetari bëri të ditur se në të njëjtat kushte u mbajt për pesë orë edhe një kameraman tjetër, duke arritur kështu afatin maksimal të parashikuar ligjërisht për shoqërimet në komisariat.

Duke folur për këtë eksperiencë në ekranin e SYRI TV, van Gerven Oei u shpreh: «Për shembull, që unë mund të lidhem me Antifa. Kuptoni? Kështu që është patjetër një përrallë. Por është interesante për mua, sepse kjo tregon që ata janë përpjekur në një farë mënyre të gjejnë një arsye për të më mbajtur».