Mjegulla dhe i ftohti përfshijnë juglindjen, policia jep apelin

Rajoni i juglindjes është përfshirë nga mjegulla e dendur dhe ulja e ndjeshme e temperaturave, duke sjellë vështirësi në qarkullimin e automjeteve në akset rrugore ku dukshmëria është e kufizuar. Kjo situatë atmosferike vijon prej disa ditësh në zona të ndryshme duke përfshirë Librazhdin, Pogradecin e deri në Korçë, duke krijuar një mot tipik të vjeshtës së vonë. Përballë këtyre kushteve të vështira, policia u bën apel drejtuesve të mjeteve të tregojnë kujdes të shtuar, të ulin shpejtësinë, të ruajnë distancën e sigurisë dhe të përdorin ndriçimin e përshtatshëm për të shmangur aksidentet. Sipas parashikimeve, mjegulla pritet të mbetet një nga problematikat kryesore për lëvizjen e automjeteve në këtë rajon, sidomos gjatë orëve të mbrëmjes dhe të mëngjesit.