Humb jetën elektricisti në Shkodër gjatë riparimit të defektit

Një elektricist 34-vjeçar ka humbur jetën mbrëmjen e kaluar në fshatin Bardhaj të Shkodrës, pasi dyshohet se ka rënë në kontakt me rrymën elektrike gjatë riparimit të një defekti në një shtyllë elektrike. Sipas informacionit paraprak të Policisë, rreth orës 20:36 në Urgjencën e Spitalit Rajonal Shkodër është dërguar pa shenja jete shtetasi Angjelin Nika, me detyrë elektricist i zonës.

Ngjarja ka ndodhur gjatë kohës që 34-vjeçari po kryente ndërhyrje në një shtyllë elektrike. Sipas të dhënave paraprake të njoftuara nga Policia, ai ishte thirrur jashtë orarit të punës nga disa familje të cilat kishin mungesë të energjisë elektrike, për të rikthyer furnizimin, por pa njoftuar paraprakisht dispeçerinë e OSHEE-së.

Pas ngjarjes, elektricisti u transportua drejt spitalit, por ka mbërritur atje pa shenja jete. Grupi hetimor, nën drejtimin e Prokurorisë, ndodhet në vendngjarje dhe po vijon punën për sqarimin e plotë të rrethanave dhe dokumentimin ligjor të rastit, sipas njoftimit zyrtar.

Në njoftimin e policisë thuhet: «Shkodër / Informacion paraprak. Rreth orës 20:36, në Urgjencën e Spitalit Rajonal Shkodër është dërguar pa shenja jete shtetasi A. N., 34 vjeç, me detyrë elektricist i zonës. Nga të dhënat paraprake dyshohet se 34-vjeçari ka rënë në kontakt me rrymën elektrike, gjatë kohës që po kryente riparimin e një defekti në një shtyllë elektrike, pasi ai ishte thirrur jashtë orarit të punës nga disa familje, të cilat kishin mungesë të energjisë elektrike, në fshatin Bardhaj, por pa njoftuar dispeçerinë e OSHEE-së. Grupi hetimor ndodhet në vendngjarje dhe, nën drejtimin e Prokurorisë, vijon punën për sqarimin e plotë të rrethanave dhe dokumentimin ligjor të rastit».