Policia shoqëron gazetarin Vincent van Gerven Oei dhe sulmon aktivisten

Policia ka shoqëruar gazetarin holandez Vincent van Gerven Oei, i njohur për investigimet e tij mbi zhvillimet politike dhe ekonomike në Shqipëri. Po ashtu, efektivët e policisë kanë goditur me spraj me piper në sy aktivisten Alisa Braho, e cila po filmonte momentin kur po shoqërohej gazetari nga organet e rendit.

Raportimet dhe investigimet mbi lidhjet mes pushtetit, sektorit të ndërtimit dhe financimeve me origjinë kriminale vijojnë të jenë në qendër të vëmendjes në vend. Ngjarja ka ndodhur gjatë një periudhe kur janë zhvilluar edhe protesta të studentëve, ku janë përdorur sasi të mëdha gazi lotsjellës, uji me presion, gurë dhe molotovë, teksa në bombolat e gazit është denoncuar mungesa e datës së skadencës.

Sipas raportimeve, gazetari Vincent van Gerven Oei ka publikuar në vazhdimësi analiza e investigime mbi Shqipërinë, duke u përqendruar veçanërisht te marrëdhëniet mes drejtuesve politikë, biznesit dhe sektorit të ndërtimit. Gazetari holandez ka analizuar së fundmi përmbajtjen e materialeve të publikuara në kuadër të investigimit «The Albanian Files» ose «Albania Files».

Në analizën e tij, gazetari Vincent van Gerven Oei ka ngritur pikëpyetje mbi ndikimin e parave të dyshuara të drogës që hyjnë pa kontroll në ekonominë shqiptare. Sipas tij, për shkak të vendimmarrjes së kryeministrit Edi Rama dhe hyrjes së këtyre financimeve, Shqipëria është kthyer në një terren ku shumë studio të huaja arkitekture dhe projektimi gjejnë hapësirë të madhe veprimi si dhe liri të plotë për zbatimin e projekteve të tyre.

Incidenti i dytë është shënuar në momentin kur aktivistja Alisa Braho po dokumentonte me pamje filmike ndalimin e gazetarit holandez. Efektivët e Policisë kanë ndërhyrë ndaj aktivistes duke i hedhur spraj me piper drejtpërdrejt në sy për të ndërprerë xhirimin e procedurës së shoqërimit.