Qeveria shpall gjendje krize në Gostivar — mbi 3.150 të infektuar nga uji

GOSTIVAR — Së pari do të duhet të bëhet hiperklorinimi i sistemit të ujësjellësit në Gostivar që uji të mund të përdoret si ujë teknik, e pastaj si ujë i pijshëm, tha sot ministri i Punëve të Brendshme Pançe Toshkovski pas vizitës në Spitalin e Përgjithshëm 'Ferid Murat' në Gostivar.

Tërë 22 ditë pompa kanë futur ujë me fekale në rrjetin e qytetit, ndërsa Agjencia për Ushqim dhe Veterinari (AUV) sot apeloi se uji ende nuk mund të përdoret. Në qytet ka mbi 3.150 të infektuar dhe nga 19 korriku është shpallur epidemi.

Qeveria sot shpalli gjendje krize 30-ditore në Komunën e Gostivarit, me qëllim koordinim më të shpejtë të institucioneve, vënien në funksion të sistemit të furnizimit me ujë dhe sigurimin e ujit të pijshëm në kohën më të shkurtër të mundshme.

Ministri i Shëndetësisë, Sašo Klekovski, tha se sipas të dhënave nga institucionet shëndetësore publike në Gostivar, dje vazhdoi trendi i uljes së numrit të pacientëve të rinj të ekzaminuar, pra personave që për herë të parë kanë kërkuar ndihmë mjekësore për shkak të simptomave të gastroenteritit.

Në Spitalin e Përgjithshëm Gostivar janë regjistruar 111 ekzaminime të reja në repartin infektiv, 65 në repartin pediatrik dhe 7 në Qendrën Urgjente, pra gjithsej 183 ekzaminime.

Prokuroria Themelore Publike Gostivar ka hapur hetime dhe ka kërkuar paraburgim 30-ditor për drejtoreshën e ndërmarrjes publike 'Komunalec' në Gostivar dhe për dy udhëheqës sektorësh, të cilët dyshohen për vepra të rënda kundër mjedisit jetësor dhe natyrës.

Burim: Tetova Sot, tetovasot.com
— Redaksia ZHURMA