Zjarrfikësit vënë nën kontroll tri vatra zjarri në Gramsh
Ndërhyrjet u kryen në Janç Mal, Vidhan dhe në Grabovë në lartësinë 2 mijë metra, ku zjarrfikësit e Gramshit bashkëpunuan me ata të Beratit.
GRAMSH — Tri vatra zjarri që shpërthyen gjatë ditës në zona të ndryshme të bashkisë së Gramshit janë vënë nën kontroll pas disa orësh pune intensive nga shërbimi zjarrfikës. Ndërhyrja e parë u zhvillua në Janç Mal, në kufi me qarkun e Beratit, ku forcat zjarrfikëse të Gramshit punuan në bashkëpunim me kolegët e Beratit për neutralizimin e flakëve.
Ndërkohë, një vatër tjetër u raportua në zonën e Grabovës, mbi Moçale, në drejtim të Varrit të Plakës, pranë kufirit me Pogradecin. Operacioni u vështirësua nga terreni i thyer dhe lartësia prej rreth 2 mijë metrash mbi nivelin e detit. Njëkohësisht, flakët përfshinë edhe zonën e Vidhanit, përballë Kërpicës, duke kërkuar ndërhyrjen e menjëhershme të ekipeve zjarrfikëse.
Sipas Shërbimit Zjarrfikës të Gramshit, të tre vatrat u vunë nën kontroll pas disa orësh pune dhe nuk raportohen rreziqe të mëtejshme. Zjarrfikësit u bënë thirrje qytetarëve të denoncojnë zjarrvëniet e qëllimshme apo pakujdesitë. Ata theksuan se do të jenë gjithmonë në vijën e parë, duke kërkuar ndihmën e qytetarëve që flakët të mos ndizen.
Burim: Euronews Albania
— Redaksia ZHURMA
