Hita takon Pisani në Romë: Të jemi një hap para grupeve kriminale

Drejtori i Përgjithshëm i Policisë së Shtetit, Skënder Hita, u takua në Romë me drejtorin e Policisë Italiane, Vittorio Pisani, me qëllim intensifikimin e bashkëpunimit dypalësh në luftën kundër krimit të organizuar, trafiqeve të paligjshme dhe krimeve kibernetike. Gjatë këtij takimi, drejtuesit e dy policive vlerësuan punën e skuadrave të përbashkëta hetimore dhe theksuan rëndësinë e shkëmbimit të informacionit për të luftuar organizatat kriminale që veprojnë përtej kufijve.

Hita tha se: «Një ndër prioritetet e mia kryesore në krye të Policisë së Shtetit është thellimi i bashkëpunimit me partnerët, veçanërisht me partnerët strategjikë, siç është edhe Italia.» Ai u shpreh i vendosur që palët të punojnë së bashku për të rritur efikasitetin e partneritetit dhe për të qenë gjithmonë një hap përpara organizatave kriminale.

Nga ana e tij, Pisani garantoi vijimin e mbështetjes për Policinë Shqiptare, duke përfshirë monitorimin ajror kundër kultivimit të bimëve narkotike. Pisani deklaroi: «Të intensifikojmë luftën e përbashkët kundër grupeve kriminale, trafiqeve të paligjshme, krimeve kibernetike dhe, padiskutim, mbështetjen e përvitshme për monitorimin ajror për parandalimin e kultivimit të bimëve narkotike.»

Të dyja palët diskutuan gjithashtu për rritjen e kapaciteteve të inteligjencës policore, luftën kundër radikalizmit dhe ekstremizmit të dhunshëm, si dhe mbrojtjen nga kërcënimet digjitale, ndërsa rikonfirmuan angazhimin për lokalizimin e personave në kërkim dhe zhvillimin e operacioneve të përbashkëta.