Rafuna: Kosova ka inflacionin më të lartë në rajon

Kryetari i Odës Ekonomike të Kosovës, Lulzim Rafuna, ka deklaruar se rritja e inflacionit po ndikon drejtpërdrejt në uljen e standardit të jetesës së qytetarëve, duke kërkuar nga ekzekutivi ndërmarrjen e hapave urgjentë. Sipas të dhënave të Agjencisë së Statistikave të Kosovës, inflacioni arriti në 7.1 për qind në tetor 2026, shifër kjo që sipas tij e pozicionon vendin me inflacionin më të lartë në rajon.

Rafuna ka theksuar se Oda Ekonomike ka kërkuar vazhdimisht përgatitjen e një pakoje masash për të parandaluar që rritja e çmimeve të rëndojë më tej buxhetin familjar. Sipas tij, ngritjet më të mëdha janë vërejtur te produkte dhe shërbime bazike, si energjia elektrike, gazi, pijet dhe ushqimi, ndërsa sektori i transportit ka shënuar një rritje prej 21 për qind si pasojë e shtrenjtimit të derivateve të naftës.

«Është mesazh që duhet të ndërmarrë veprime, hapa konkretë për ta zbutur, aq sa është e mundur, inflacionin», ka deklaruar ai, duke shtuar se kjo situatë rëndohet edhe më shumë nga varësia e madhe që vendi ka nga importi.