Tri projektligje dhe raporti i auditimit në seancën e Kuvendit

Kuvendi i Kosovës zhvillon sot seancën plenare të caktuar për të nisur në orën 12:00, ku në rend dite figurojnë tri projektligje dhe raporti vjetor i auditimit. Fillimisht, puna e deputetëve do të hapet me miratimin e procesverbalit të mbledhjes së kaluar, të ndjekur nga deklarimet jashtë rendit të ditës dhe pyetjet parlamentare.

Agjenda e seancës parasheh shqyrtimin e parë të Projektligjit për Agjencinë e Menaxhimit të Emergjencave, Projektligjit për Regjistrimin e Bujqësisë, si dhe Projektligjit për Inspektoratin Qendror të Bujqësisë, Sigurisë Ushqimore, Veterinës dhe Pylltarisë. Po ashtu, trupi legjislativ do të shqyrtojë Raportin e Auditorit të Përgjithshëm për Raportin Vjetor të Auditimit të Buxhetit të Republikës së Kosovës për vitin 2025.

Gjatë kësaj mbledhjeje, deputetët do të shqyrtojnë edhe propozimet e grupeve parlamentare për emërimin dhe zëvendësimin e anëtarëve në komisionet parlamentare, si dhe fushëveprimin e komisioneve për Legjislaturën XI.