Trepça mposhtet nga skuadra greke në FIBA Europe Cup

Kampionia e Kosovës në basketboll, Trepça, ka regjistruar humbje në përballjen e dytë kundër skuadrës greke Promitheas Patras, me rezultatin 81:71. Ndeshja, e vlefshme për Grupin A të FIBA Europe Cup, u karakterizua nga një epërsi e vendësve që në periudhën e parë, e cila u mbyll me shifrat 17:9, ndërsa pjesa e parë përfundoi 37:31 për nikoqirët. Pasi çereku i dytë i takoi mitrovicasve 22:20 dhe i treti u mbyll i barabartë 16:16, shkëputja vendimtare e grekëve nisi në fillim të dhjetëminutëshit të fundit.

Te skuadra e Trepçës, e cila tash ka regjistruar tri fitore e po aq humbje, u dallua Shawn Jones me 15 pikë e gjashtë kërcime. JP Tokoto kontribuoi me 11 pikë, shtatë kërcime e pesë asistime, kurse Andrew Thelwell shtoi 12 pikë. Nga lojtarët vendorë, Mikaile Tmushiq shënoi tetë pikë, Dardan Kapiti katër, kurse Drilon Hajrizi e përfundoi takimin me dy pikë. Ndërkaq, Promitheas Patras pas kësaj fitoreje numërore katër fitore e dy disfata në grup.

Ndeshjen e radhës, ekipi nga Mitrovica do ta zhvillojë më 18 nëntor kundër Splitit, në palestrën “Minatori”.