Jeta luksoze e Hajdar Çopjas në Dubai zbulohet nga pamjet

Emisioni investigativ në News24 ka publikuar pamje dhe detaje mbi stilin e jetesës që bën në Emiratet e Bashkuara Arabe Hajdar Çopja, 42-vjeçari nga Elbasani. I njohur gjithashtu me identitetet Hajdar Bako, Hysa apo Dari i Elbasanit, ai rezulton i shpallur në kërkim për dyshimet rreth përfshirjes në një nga organizatat më të fuqishme të trafikut ndërkombëtar të kokainës. Në materialet e shfaqura shihen automjete të shtrenjta, ora me vlerë të lartë dhe prona të kushtueshme që ekspozohen në rrjetet sociale, ndërkohë që Dubai përshkruhet si një strehë ku individët e kërkuar i shmangen përballjes me drejtësinë dhe ekstradimit.

Sipas të dhënave të bëra publike, deri në vitin 2024 mendohet se rreth 25 shtetas shqiptarë kërkoheshin nga autoritetet, ndërsa mbi 100 të tjerë konsideroheshin të lidhur me aktivitete kriminale. Investigimi përfshin edhe vëllain e tij, Franc Çopja, i cili u ekstradua nga Dubai drejt Belgjikës në dhjetor të vitit 2023 dhe u dënua në janar të vitit 2026 me 25 vjet burg për porositjen e vrasjes së Ardit Spahiut në Bruksel, ndërsa Mikael Qosja dhe Flobenc Meçja morën dënime me burgim të përjetshëm. Dokumentari trajton gjithashtu përplasjet e përgjakshme mes familjeve Çopja dhe Alibej për pazaret e drogës.

Dëshmia e Erion Alibejt përpara hetuesve belgë hedh dritë mbi investimet e dyshuara të vëllezërve Çopja në Dubai, ku përfshihet blerja e një apartamenti në zonën luksoze të Palmës për rreth 20 milionë euro, krahas një hetimi të mëparshëm belg që fliste për një pronë tjetër me vlerë rreth 760 mijë euro. Aktiviteti i këtij grupi kriminal lidhet po ashtu me ngjarje të rënda dhe vrasje me porosi në Shqipëri dhe në vende të ndryshme të Evropës.