Travelbinger rendit Shqipërinë si destinacion ekonomik udhëtimi për vitin 2026

Media amerikane e specializuar në turizm dhe udhëtime, Travelbinger, ka analizuar mundësitë e udhëtimit ekonomik 10-ditor në Shqipëri, duke vlerësuar se vendi mbetet një destinacion i përballueshëm për turistët evropianë gjatë vitit 2026 me një buxhet ditor që nis nga 28 dollarë.

Shqipëria është përfshirë gjatë viteve të fundit në lista të shumta të destinacioneve më ekonomike në Evropë. Udhëzuesi i publikuar bazohet në çmimet e parashikuara për vitin 2026 për akomodimin, transportin, ushqimin dhe vizitat në pikat turistike. Ndërkohë që disa udhëzues turistikë llogaritin shpenzimet ditore të një turisti me buxhet të kufizuar midis 30 dhe 45 eurove, vlerësime të tjera e vendosin këtë interval nga 35 deri në 50 euro në ditë, pa përfshirë biletat e avionit.

Gazetari Marco Kopinke shkruan në artikullin e botuar në Travelbinger se për të respektuar një buxhet prej 28 dollarësh në ditë, vizitorëve u nevojitet të bëjnë zgjedhje të përcaktuara mirë gjatë qëndrimit. Kopinke vëren se udhëtarët mund të akomodohen në dhoma të përbashkëta në bujtina, të hanë në furra buke e lokale ekonomike, të përdorin autobusët ose furgonët për transport dhe të vizitojnë kryesisht atraksione pa pagesë. Sipas tij, rehatia gjatë udhëtimit realizohet përmes përzgjedhjes së kujdesshme të shërbimeve dhe jo domosdoshmërisht me shpenzime të larta.

Periudha e përzgjedhur për udhëtim ndikon në mënyrë të drejtpërdrejtë në kostot përfundimtare, posaçërisht në zonat bregdetare. Gjatë muajve korrik dhe gusht, shpenzimet ditore mund të kalojnë 120 euro nëse përfshihen makina me qira, akomodimi në hotele bregdetare dhe qëndrimi në plazh. Çmimi i marrjes së një makine të vogël me qira ndryshon nga 7 deri në 20 euro në ditë jashtë sezonit turistik, ndërsa gjatë sezonit të lartë lëviz nga 20 deri në 35 euro ose më shumë. Po ashtu, në Ksamil marrja e shezlongëve në plazh kushton nga 10 deri në 25 euro në ditë në varësi të periudhës dhe vendndodhjes.

Një mënyrë e sugjeruar për uljen e shpenzimeve është ndjekja e një itinerari të përqendruar gjeografikisht. Një rrugëtim që përfshin Tiranën, Beratin, Gjirokastrën, Sarandën, si dhe vizita ditore në Ksamil e Butrint, u mundëson turistëve të njohin kryeqytetin, dy qytete të mbrojtura nga UNESCO dhe bregdetin e jugut. Shpenzimet ditore për një udhëtar me buxhet të kufizuar llogariten 25 deri në 40 euro në Berat e Gjirokastër, ndërsa në Tiranë shkojnë nga 30 deri në 45 euro. Një turist ka raportuar se ka shpenzuar gjithsej 62 dollarë për transportin me autobus gjatë një jave udhëtimi në këtë itinerar.