Kryeministri Rama vizitë zyrtare në Bruksel për Samitin e Zgjerimit

Kryeministri Edi Rama ndodhet në një vizitë zyrtare në Bruksel për të marrë pjesë në Samitin e Euronews mbi Zgjerimin e Bashkimit Evropian, një forum i nivelit të lartë kushtuar perspektivës së vendeve aspirante për anëtarësim, sipas njoftimit të Kryeministrisë. Gjatë këtij aktiviteti, kreu i qeverisë shqiptare do të bisedojë me gazetarët për ecurinë e vendit në këtë proces, ndërkohë që paralelisht vijon puna teknike dhe takimet për mbylljen e grupkapitujve të radhës në negociatat e integrimit.

Në agjendën e vizitës në kryeqendrën evropiane përfshihen gjithashtu takime të rëndësishme institucionale. Kryeministri do të takohet me Presidentin e Këshillit Evropian, António Costa, si dhe me Sekretarin e Përgjithshëm të NATO-s, Mark Rutte, për të diskutuar çështje të bashkëpunimit dhe axhendës evropiane.