Transformimi i shpejtë i bregdetit të Sarandës dhe ndikimi në peizazh
Zhvillimet turistike dhe rezidenciale po shtrihen nga kodrat deri pranë vijës së detit në Sarandë, duke ndryshuar peizazhin natyror.
SARANDË — Zona bregdetare e Sarandës po përballet me ndryshime të shpejta, pasi projektet rezidenciale dhe turistike po përhapen nga zonat kodrinore deri pranë detit. Peizazhi dikur i karakterizuar nga gjiret, bimësia mesdhetare dhe relievi shkëmbor po merr një pamje tjetër përmes kodrave të gërmuara dhe komplekseve të ndërtuara. Ndërhyrjet, të dukshme nga deti, shtrihen nga Ksamili deri në hapësirat përreth, duke prekur zona si «Arameras», «Kep Merli», Gjirin e Manastirit dhe Plazhin e Pasqyrave. Në pjesën jugore, kompleksi «Arameras» përfshin 70 vila dhe njësi akomoduese mbi një shpat të mbuluar pjesërisht nga gjelbërimi, ndërsa në Gjirin e Manastirit dendësia e ndërtimeve ka modifikuar relievin e zonës në një hapësirë prej mbi pesë hektarësh, duke prekur gjithashtu potencialin arkeologjik pranë Parkut Kombëtar të Butrintit.