Çfarë vlerëson tenori maqedonas Darko Todorovski për Operën e Kosovës?

PRISHTINË — Tenori maqedonas Darko Todorovski, i cili interpretoi rolin e Messer Amantio Di Nicolao në operën “Gianni Schicchi”, ka vlerësuar lartë nivelin artistik dhe organizimin e Operës së Kosovës, duke e cilësuar përvojën si një nder dhe kënaqësi të veçantë. Todorovski, në një intervistë për KosovaPress, tha se produksioni është realizuar me përkushtim, profesionalizëm dhe pasion të sinqertë nga i gjithë ekipi i përfshirë. “Ka qenë një kënaqësi e madhe dhe një nder i veçantë të jem pjesë e këtij produksioni të ‘Gianni Schicchi’ me Operën e Kosovës. Besoj se ky ka qenë një produksion i një niveli shumë të lartë artistik, i realizuar me përkushtim të jashtëzakonshëm, profesionalizëm dhe pasion të sinqertë nga të gjithë të përfshirët”, tha ai. Ai u shpreh i impresionuar edhe nga organizimi i institucionit, duke theksuar se artistëve u ishte krijuar një ambient ku mund të fokusoheshin plotësisht në interpretim. “Jam impresionuar vërtet nga niveli i lartë i organizimit të Operës së Kosovës. Çdo aspekt i këtij produksioni është menaxhuar me profesionalizëm dhe kujdes të madh, duke krijuar një mjedis ku artistët mund të përqendroheshin plotësisht te muzika dhe rrëfimi i historisë. Është frymëzuese të shohësh një përkushtim të tillë ndaj përsosmërisë artistike”, u shpreh Todorovski.

Bashkëpunimi me solistët vendas, orkestrën, korin dhe ekipin krijues ishte një përvojë e jashtëzakonshme, ndërsa tenori shpreson që në të ardhmen të rikthehet për bashkëpunime të reja me Operën e Kosovës. “Shpresoj sinqerisht që ky produksion të arrijë te sa më shumë publik dhe që në të ardhmen të kem mundësinë të rikthehem e të bashkëpunoj sërish me Operën e Kosovës”, përfundoi tenori maqedonas. Pas premierës së mbajtur më 1 korrik 2026, Opera e Kosovës e riktheu sonte, më 3 korrik 2026, në skenën e Sallës AMC në Prishtinë, nga ora 20:00, “Diptikun” e Giacomo Puccinit, të përbërë nga operat “Suor Angelica” dhe “Gianni Schicchi”.

*Burim: Lajmi.net, https://lajmi.net/tenori-maqedonas-vlereson-operen-e-kosoves-ka-nivel-te-larte-artistik-shpresoj-te-rikthehem/*

— Redaksia ZHURMA