Të rinjtë e godasin me grushte 46-vjeçarin në Kakomesë, përfundon në spital
Një 46-vjeçar u plagos në Kakomesë pasi një grup të rinjsh e pyetën pse po filmonte dhe e goditën me grushte.
Redaksia ZHURMA · · 1 min lexim
Një konflikt fizik në zonën e Kakomesë ka përfunduar me plagosjen e një 46-vjeçari, Gentjan Papagjika, banor i Sarandës. Sipas dëshmisë së tij, ai po regjistronte me telefon zonën e plazhit kur një grup të rinjsh, që lëviznin me makinë, ndaloi pranë tij dhe e pyeti në mënyrë agresive: “Pse filmon?”.
Debati verbal dyshohet se u përshkallëzua në dhunë fizike, ku të rinjtë e fyen dhe e goditën me grushte përpara se të largoheshin. Si pasojë, 46-vjeçari pësoi dëmtime dhe fraktura në trup. Fillimisht ai u dërgua për ndihmë mjekësore në Sarandë, ndërsa më pas u transportua drejt Janinës për trajtim të specializuar.
Policia është vënë në kërkim të personave të përfshirë, të cilët sipas informacioneve paraprake janë identifikuar. Autoritetet po vijojnë hetimet për zbardhjen e plotë të rrethanave dhe përgjegjësive të secilit prej të përfshirëve.
