SOS Telefoni Ulqin kërkon financim të qëndrueshëm për mbrojtjen e grave
Në tryezën përmbyllëse të projektit u prezantuan rezultatet shqetësuese të hulumtimit mbi dhunën ndaj grave.
Redaksia ZHURMA · · 1 min lexim
SOS Telefoni Ulqin ka bërë thirrje për financim të qëndrueshëm të shërbimeve mbështetëse dhe reagim në kohë nga institucionet, gjatë tryezës përmbyllëse të projektit “Gra të sigurta – Komunitete të fuqizuara”. Në këtë ngjarje u prezantuan rezultatet e hulumtimit të realizuar me mbështetjen financiare të Ministrisë së Mirëqenies Sociale, Kujdesit për Familjen dhe Demografisë së Malit të Zi, i cili përfshiu 100 gra nga Komuna e Ulqinit. Hulumtimi tregoi se 76 për qind e grave të anketuara kanë përjetuar dhunë në familje gjatë jetës, ndërsa 86 për qind nuk i njohin institucionet dhe shërbimet që ofrojnë ndihmë. Drejtoresha ekzekutive e SOS Telefonit Ulqin, Hatixhe Nelaj, theksoi nevojën për informacion më të arritshëm dhe koordinim më të mirë ndërmjet shërbimeve të mbrojtjes, duke veçuar turpin, frikën dhe varësinë ekonomike si pengesa kryesore për kërkimin e ndihmës.
