Sofra e gurtë para Kryeministrisë kthehet në atraksion për qytetarët

TIRANË — Objekti prej guri që qëndron prej më shumë se dy javësh përballë Kryeministrisë është shndërruar në një vend ku kalimtarët ndalen për t'u çlodhur dhe për të realizuar fotografi. Sipas pamjeve të shpërndara nga kryeministri Edi Rama, mbi tryezë janë vendosur letra me mbishkrimin «DIALOG». Kreu i qeverisë ka shprehur gatishmërinë për të shqyrtuar shqetësimet dhe propozimet e ngritura, por ftesa e tij deri më tani është refuzuar nga protestuesit, të cilët këmbëngulin në kërkesën për dorëheqjen e tij dhe paralajmërojnë protestë kombëtare para Ministrisë së Arsimit.

Në kuadër të komunikimit publik, pak ditë më parë u prezantua platforma online «Fol me kryeministrin», e cila synon t'u mundësojë qytetarëve dhe studentëve drejtimin e pyetjeve, kritikave dhe propozimeve për vendimmarrjet. Ky kanal interaktiv përfshin mundësinë e bashkëbisedimit jo vetëm me kryeministrin, por edhe me anëtarë të tjerë të qeverisë dhe të grupit parlamentar.