Si u bë Albjon Gjorllaku balerin në Kompaninë Kombëtare të Baletit të Kanadasë?

TORONTO — Albjon Gjorllaku, i lindur në Londër me rrënjë nga Dibra, është një nga emrat që po shkëlqejnë në baletin ndërkombëtar, duke u bërë pjesë e Kompanisë Kombëtare të Baletit të Kanadasë (The National Ballet of Canada). Për të, baleti nuk ishte thjesht një profesion, por një thirrje që e ndjeu që në fëmijëri, e cila u shndërrua në mënyrë jetese falë disiplinës dhe pasionit të pandalshëm.

Momenti vendimtar në karrierën e tij erdhi me pranimin dhe diplomimin në The Royal Ballet School në vitin 2017. Atje kuptoi se arti i baletit kërkon përsosmëri në çdo detaj, ndërsa suksesi ndërtohet me punë të përditshme dhe përkushtim. Pas diplomimit, Albjoni iu bashkua Orlando Ballet për dy vite, përpara se të pranonte sfidën e radhës në Kanadë në vitin 2019.

Në vitin 2022, ai u promovua në Corps de Ballet — një arritje që, sipas tij, përfaqëson shpërblimin e shumë viteve sakrificë dhe stërvitje intensive. Edhe pse jeton dhe punon në Toronto, lidhja me Shqipërinë mbetet e fortë. Albjoni e sheh identitetin shqiptar si një pasuri që e shoqëron në çdo skenë, duke e përfaqësuar vendin me dinjitet para publikut ndërkombëtar.

Gjatë karrierës së tij, ai ka interpretuar role të rëndësishme si Dhelpra në "Arrëthyesi", Benvolio në "Romeo dhe Xhulieta", në "Liqenin e mjellmave" dhe Sanço Panxha në "Don Kishoti". Për Albjonin, çdo personazh është një histori që merr jetë përmes lëvizjes, pasi baleti është arti ku emocionet flasin pa nevojë për fjalë.

Megjithëse publiku sheh vetëm elegancën dhe dritat e skenës, pas çdo shfaqjeje fshihen vite stërvitjeje, lodhjeje dhe sakrificash personale. Albjoni beson se baleti është një gjuhë universale që bashkon njerëzit përtej kufijve dhe kulturave. Për të, artisti ka misionin të krijojë emocione dhe të afrojë njerëzit përmes bukurisë së artit.

Edhe pse ka arritur në një nga skenat më prestigjioze të botës, Albjoni nuk e sheh suksesin si një pikë mbërritjeje. Synimi i tij është të vazhdojë të rritet artistikisht, të interpretojë role të reja të repertorit klasik dhe bashkëkohor, dhe të dëshmojë se me punë dhe këmbëngulje, asnjë ëndërr nuk është e pamundur.

Burim: ABC News
— Redaksia ZHURMA