Çfarë e bën Shqipërinë vendin më të shtrenjtë për ushqime në rajon?

TIRANË — Çmimet e ushqimeve në Shqipëri kanë kaluar për herë të parë mesataren e Bashkimit Europian, duke u bërë vendi i vetëm në rajon me këtë tregues. Sipas të dhënave të Eurostat të përpunuara nga Monitor, indeksi i çmimeve të ushqimeve sipas fuqisë blerëse ka shkuar në 102.9% në 2025, nga 99.6% një vit më parë dhe 85% në 2022.

Rritja është e shpejtë. Një shportë që në BE kushton 100 euro, në Shqipëri kushton rreth 103 euro — ndërkohë që të ardhurat për frymë të shqiptarëve janë vetëm 43% e mesatares europiane dhe konsumi individual 48%.

Shqipëria renditet e parafundit në Europë për konsumin sipas fuqisë blerëse, duke lënë pas vetëm Bosnjën. E thënë ndryshe, familjet shqiptare duhet të shpenzojnë një pjesë shumë më të madhe të buxhetit për ushqim se sa qytetarët e vendeve më të pasura.

Vendet e tjera të rajonit mbeten dukshëm nën mesataren europiane. Serbia ka indeks 96.6, Mali i Zi dhe Bosnjë-Hercegovina rreth 84.6, ndërsa Maqedonia e Veriut mbetet më e lira me 74.3%. Të dhënat për Kosovën mungojnë.

Kontrasti bie në sy edhe në çmimet direkte, jo vetëm të përshtatura. Studimi "Indeksi i Konkurrencës në Treg (MCI) për Ballkanin Perëndimor: 2026" i Ilir Cikos gjeti se produktet e njëjta në supermarkete shqiptare kushtojnë 83% më shumë se në tregun europian, pasi hiqet efekti i TVSH-së. Fuqia blerëse e konsumatorit shqiptar është vetëm 41% e mesatares së BE-së.

Ankesat nuk vijnë vetëm nga vendasit. Turistë të huaj në forume si Reddit dhe Tripadvisor shqetësohen për çmimet e larta në supermarkete, duke i krahasuar ato me vendet perëndimore. Qeveria ka si ambicie anëtarësimin në BE, por vendi po afrohet me Europën në nivel çmimesh shumë më shpejt sesa në nivel të ardhurash.

Ky fenomen redukton fuqinë reale blerëse të familjeve dhe shpjegon pse perceptimi i qytetarëve për mirëqenien mbetet më negativ sesa treguesit e rritjes ekonomike. Shqipëria vazhdon të jetë vendi më bujqësor në Europë me 15% të ekonomisë nga bujqësia, por konsumatorët detyrohen të blejnë produkte të shtrenjta importi ose vendase me çmime të larta për shkak të mungesës së konkurrueshmërisë.

Burim: Gazeta Express
— Redaksia ZHURMA