KLSH: 41% e investimeve të 2025 u kryen në dhjetor dhe 250 mln euro për fatura të vjetra

Kontrolli i Lartë i Shtetit raporton se 40.6% e totalit vjetor të investimeve publike u realizuan vetëm gjatë muajit dhjetor 2025. Sipas auditimit, shpenzimet buxhetore të këtij muaji arritën në 162.5 miliardë lekë, ku u përfshinë 53.4 miliardë lekë shpenzime kapitale dhe një transfertë prej 16.6 miliardë lekësh në llogarinë e Fondit të Pensioneve pranë Bankës së Shqipërisë, e cila sipas institucionit nuk përbën shpenzim efektiv.

KLSH thotë se ky vëllim i lartë pagesash rrit rrezikun e mangësive në kontrollet përpara pagesës dhe vështirëson menaxhimin e likuiditetit. Gjatë muajit të fundit të vitit u shlyen 24.8 miliardë lekë, ose rreth 250 milionë euro, për fatura të lëshuara në muajt dhe vitet e mëparshme. Kjo përfshinte 14.96 miliardë lekë për investime kapitale dhe 8.90 miliardë lekë për shpenzime operative të periudhës janar–nëntor 2025, si dhe 955 milionë lekë për fatura të vitit 2024 e më parë.

Ky përqendrim ndryshoi bilancin buxhetor, duke e kthyer suficitin prej 49.1 miliardë lekësh të akumuluar deri në fund të nëntorit në një deficit vjetor prej 47.1 miliardë lekësh. Për investimet publike, ritmi në dhjetor ishte rreth 7.5 herë më i lartë se mesatarja mujore e njëmbëdhjetë muajve të parë të vitit.